Skip to main content

አካዳሚው 4 ወርቅ፣2ብር እና 2 የነሀስ ሜዳሊያዎችን በመሰብሰብ ሻምፒዮናውን አጠናቀቀ

አካዳሚው 4 ወርቅ፣2ብር እና 2 የነሀስ ሜዳሊያዎችን በመሰብሰብ ሻምፒዮናውን አጠናቀቀ

የኢትዮጵያ አትሌቲክስ ፌዴሬሽን ያዘጋጀው ከየካቲት 23-28/2013ዓ.ም በአሰላ አርንጓዴው ስታዲየም ሲያካሂድ የቆየው 2ኛው የኢትዮጵያ ታዳጊዎች አትሌቲክስ ሻምፒዮና ተጠናቀቀ።

አካዳሚው በሻምፒዮናው 19 ወንድ እና 12 ሴት በድምሩ 31 ሰልጣኞችን ከ18 አመት በታች ውድድሮች ላይ በማሳተፍ 4 ወርቅ፣2ብር እና 2 የነሀስ ሜዳሊያዎችን በመሰብሰብ ሻምፒዮናውን ሲያጠናቅቅ ለአካዳሚው የተገኙትን ሜዳሊያዎች አኬሎ ኡጁሉ በከፍታ ዝላይ ወርቅ እና በሱሉስ ዝላይ ነሀስ ሲያገኝ ፣ሸሪፍ ረዲ በወንዶች 100ሜትር ወርቅ፣ገመቹ በቀለ በወንዶች 800ሜትር ወርቅ ፣ ታደለ አዱኛ በ400 ሜትር መሰናክል ወርቅ ፣ብርትኳን ተስፋዬ በሴቶች 800ሜትር ብር ፣በወንዶች 2000ሜትር መሰናክል ደግሞ አበበ በላይ እና ሽመልስ ንጉሴ በቅደም ተከተል ብርና ነሀስ በማግኘት የአካዳሚውን ሜዳሊያ መሰብሰብ ችለዋል።

የእድሜ ተገቢነት ችግር በተስተዋለበት በዚህ ሻምፒዮና አካዳሚውን ጨምሮ ክልሎች ፣ ከተማ አስተዳደሮች እና የአትሌቲክስ ማሰልጠኛ ማዕከላት የተሳተፉ ሲሆን በአጠቃላይ ውጤት ኦሮሚያ ክልል ፣የአትሌት ጥሩነሽ ዲባባ አትሌቲክስ ማሰልጠኛ ማዕከል እና ደቡብ ክልል በቅደም ተከተል ከ1ኛ-3ኛ ያለውን ደረጃ ይዘው አጠናቀዋል።

ሻምፒዮናው ከተጠናቀቀ በኃላ አስተያየታቸውን የሰጡን የአካዳሚው የአትሌቲክስ ስልጠና ክፍል ኃላፊ አሰልጣኝ የሺጥላ ካሳ ሰልጣኞቹ ከእድሜ አቻዎቻቸው ጋር ተወዳድረው የተገኘው ውጤት ጥሩ መሆኑን ገልፀው በኮሮና ቫይረስ ምክንያት ሰልጣኞቹ በየአካባቢያቸው ሲሰለጥኑ ቆይተው በአካዳሚው የኮቪድ ፕሮቶኮል መሰረት ወደ አካዳሚው ከተቀላቀሉ ገና አንድ ወር ሳይሞላቸው ወደ ውድድር መግባታቸው በውጤታቸው ላይ አሉታዊ ተፅዕኖ ቢያሳድርም ነገር ግን ሰልጣኞቹ በሻምፒዮናው ላይ መሳተፋቸው ያሉበትን ደረጃ ለመገምገም ትልቅ እድል ፈጥሮልናል ብለዋል።