Skip to main content

አካዳሚው የ2013ዓ.ም የኢትዮጵያ የሴቶች 2ኛ ዲቪዚዮን ፕሪሚየር ሊግ ውድድሩን ከጥሩነሽ ዲባባ ጋር 1ለ1 በመለያየት አጠናቀቀ

አካዳሚው የ2013ዓ.ም የኢትዮጵያ የሴቶች 2ኛ ዲቪዚዮን ፕሪሚየር ሊግ ውድድሩን ከጥሩነሽ ዲባባ ጋር 1ለ1 በመለያየት አጠናቀቀ

በኢትዮጵያ የሴቶች 2ኛ ዲቪዚዮን ፕሪሚየር ሊግ እየተሳተፈ የሚገኘው የአካዳሚው የሴቶች ከ19 አመት በታች እግር ኳስ ሰልጣኞች ቡድን የሊጉን የመጨረሻ 18ኛ ጨዋታውን መጋቢት 12/2013ዓ.ም ከጥሩነሽ ዲባባ አትሌቲክስ ማሰልጠኞ ማዕከል የሴቶች እግር ኳስ አቻው ጋር ጠዋት 2:00 ሰአት ላይ በሀዋሳ አርቴፊሻል ስታዲየም አድርጎ 1ለ1 ተለያየ።

በጫወታው የመጀመሪያ አጋማሽ ጥሩነሽ ዲባባ የጨዋታ ብልጫ በመውሰድ ጨዋታው ከመጀመሩ ገና በ4ኛው ደቂቃ የመጀመሪያውን ጎል ማስቆጠር የቻሉ ሲሆን ወደ ግብ ክልል በቀላሉ በተደጋጋሚ በመድረስ የተሻለ እንቅስቃሴ ያደረጉት የአትሌት ጥሩነሽ ዲባባ ተጫዋቾች በ24ኛው ደቂቃ የፍፁም ቅጣት ምት ቢያገኙም ሳይጠቀሙበት የቀሩ ሲሆን በርካታ የጎል አጋጣሚዎች ቢያገኙም ሳይጠቀሙበት ቀርተው የመጀመሪያው አጋማሽ 1ለ0 ተጠናቋል።

በሁለተኛው አጋማሽ ተጠናክሮ ወደ ሜዳ የተመለሰው አካዳሚው ፍፁም የጨዋታ ብለጫ በመውሰድ በ59ኛ ደቂቃ በንግስት በቀለ አማካኝነት የአቻነቱን ጎል አስቆጥሯል ።

በጨዋታው ሁለቱም ቡድኖች ተጨማሪ ጎል ለማስቆጠር ጥረት ቢያደርጉም የውጤት ለውጥ ሳይኖር ጨዋታው 1ለ1 ተጠናቋል። የአካዳሚው ተጫዋች ንግስት በቀለ በሊጉ ካደረገቻቸው 18 ጨዋታዎች 15 ጎሎችን በማስቆጠር ለኢትዮጵያ የሴቶች እግር ኳስ እጅግ ተስፋ ሰጪ ተተኪነቷን በማስመስከር የሊጉ ከፍተኛ ጎል አስቆጣሪ በመሆን አጠናቃለች። አካዳሚው በሊጉ ካደረጋቸው 18 ጨዋታዎች ሰባቱን አሸንፎ በስድስቱ አቻ ሲለያይ ቀሪዎቹን 5 ጨዋታዎች ደግሞ ተሸንፎ በተጋጣሚዎቹ ላይ 22 ጎሎች ሲያስቆጥር 18 ጎሎች ደግሞ ተቆጥረውበት በአጠቃላይ 27 ነጥቦችን በመሰብሰብ ዛሬና ነገ ሶስት ተጠባቂ ጨዋታዎች እየቀሩ 4ኛ ደረጃን ይዞ አጠናቋል።

ከስፖርታዊ ጨዋነት አንፃር አካዳሚው በሊጉ ካደረጋቸው 18ጨዋታዎች 4 የቢጫ ካርድ ብቻ የተመዘገበበት ሲሆን ይህም አካዳሚው ተተኪዎችን ከስነ ምግባር አንፃር ኮትኩቶ ከማሰልጠን ረገድ እጅግ ተስፋ ሰጪ መሆኑን ያመላክታል።

የሊጉን መጠናቀቅ መነሻ በማድረግ አስተያየታቸውን የሰጡን የአካዳሚው አሰልጣኝ ቻለው ለሜቻ በውድድሩ ከጎናቸው በመሆን ከፍተኛ ሙያዊ ድጋፍ ያደረጉላቸውን የሙያ አጋሮቻቸውን እና "የኮቺንግ ስታፍ" አባላትን ያመሰገኑ ሲሆን አያይዘውም በሊጉ ወደ ውድድር ከመግባታችን በፊት ካቀድነው እቅድ በላይ አሳክተናል ያሉት አሰልጣኝ ቻለው በውድድሩ ሰልጣኞቹ ከሁሉም ክለቦች በአንፃራዊ እድሜያቸው አነስተኛ መሆን ፣የልምድ ማነስ፣የጨዋታ መደራረብ፣ የኮቪድ ስጋት እና የመደበኛ ትምህርት ጫና ቢፈጥርባቸውም ሰልጣኞቹ ባለፉት ሶስት አመታት የተሰጣቸውን የክህሎት ፣የቴክኒክና ታክቲክ ንድፍ ሀሳብና የተግባር ስልጠና በዚህ ውድድር ላይ ተግባራዊ ማድረጋቸው ሰልጣኞቹ በበርካታ ክለቦች ተፈላጊ እንዲሆኑ አድርጓቸዋል ብለዋል።በተጨማሪም ሰልጣኞቹ በዘንድሮው አመት የአካዳሚውን የ4 አመት የስልጠና ጊዜ የሚያጠናቅቁ ስለሆነ ክለቦች ከወዲሁ ለአካዳሚው ህጋዊ ደብዳቤ በማቅረብ ሰልጣኞቹን ማዘዋወር እንደሚችሉ ጠቁመዋል።